Pagkapaslang ng walong NPA sa Sorsogon, hindi masaker

Gamit ang kagalingan sa taktika ng pakidigma, nagapi ng mga sundalong pinamunuan ni 2nd Lt Alfie Ayo ang mga bandido na nakasagupa sa Bgy Calmayon, Juban Sorsogon noong umaga ng Hulyo 6, 2013. (Larawan ni Kawal Pinoy)

LEGASPI CITY----Mariing pinabulaanan ng pamunuan ng Philippine Army sa Bicol ang paratang ng mga CPP-NPA-NDF na masaker ang pagkapaslang sa walong mga kasapi nito sa Juban, Sorsogon. 

Ayon kay Colonel Joselito Kakilala, ang pinuno ng 903rd Brigade na syang nangangasiwa sa buong lalawigan ng Sorsogon at islang lalawigan ng Masbate, isang lehitimong engkwentro ang naganap noong nakaraang Sabado ng umaga, ika-6 ng Hunyo 2013. 

"Nagkaroon ng palitan ng putok at ang mga bandido pa ang naunang nagpaputok nang makita ang papalapit na sundalo na gumapang papalapit sa kanila," sabi ni Kakilala. 

Sabi pa ni Kakilala, umabot sa humigit kumulang sa kalahating oras ang palitan ng putok ng magkabilang panig ngunit nanaig ang kagalingan ng mga sundalo sa pakikidigma. 

Nasamsam mula sa mga bandido ang pitong matataas na kalibre ng baril kasama na ang limang M16 Rifles at  dalawang M203 Grenade Launchers. 

Nabawi rin mula sa mga bandido ang dalawang improvised bombs na ginagamit ng mga bandido sa pang-aambush ng mga sundalo at kapulisan. 

Hindi rin aniya totoo na nakakumpiska ng perang umabot sa P300,000.00 ayon sa isinawalat ng CPP-NPA-NDF.

"Kung totoong me pera silang ganon kalaki, maaaring dala-dala ito ng mga nakaeskapong mga kasamahan nila. Nananawagan ako sa bandidong me hawak nito na gawin na lamang itong abuloy para sa mga kapamilya ng mga nasawing bandido," dagdag ni Kakilala.

Hindi na nakapagtatakang naghuhumiyaw ng paglabag sa karapatang pantao at International Humanitarian Law ang mga bandido tuwing nalalagasan sila sa mga bakbakan laban sa militar. 

Ngunit kung susuriin ang kanilang mga proklamasyon sa kanilang mga websites, walang habas naman ang kanilang pagpatay ng mga inosenteng sibilyan na pinagbibintangan nilang mga espiya ng militar. 

Matatandaang umabot sa humigit kumulang na 50 ka tao ang pinaslang ng mga bandidong NPA sa Kabikolan simula noong taong 2009 hanggang 2010. 

Kasama sa mga biktima ay mga sundalo at CAFGU na nakabakasyon, pati mga pulis at mga sibilyang napagbibintangan ng mga bandidong NPA ng kung anu-anong mga kasalanan kagaya ni Jason Nierbesa ng Camalig, Albay na pinatay dahil sa akusasyong ito ay isang holdaper. 

Pitong matataas na kalibre ng baril at mga ipinagbabawal na bomba (landmine) ang nasamsam ng militar mula sa walong bandidong nasawi sa engkwentro. Ang mga naturang armas ay ginamit ng mga bandido sa pakikipagpalitan ng putok sa mga magigiting na mga sundalo ng 31st Infantry Battalion (Larawan mula sa 31st Infantry Battalion).