Grupo ng Kabataang Muslim sa Salam Mosque Compound, Culiat, Quezon City, namahagi ng mga relief goods sa mga nasunugan sa Barangay Apolonio Samson, Quezon City

Nabatid na nagkaroon ng sunog sa nasabing lugar noong bisperas ng Bagong Taon kung saan 800 na bahay ang natupok ng apoy at pinaghihinalaang nagmula ang sunog sa mga paputok. Humigit kumulang apat na libong pamilya ang nawalan ng tahanan at mga kagamitan sa nasabing trahedya.

Ang Grupong United Youth for Peace and Development (UNYPAD) sa pamumuno nila Mr. Alvinsor F Zinggon at Mr. Mohammad "Kuya Amin" Ramalan Hamza, kasama ang Motorcycle Riders of Quezon City sa pamumuno ni “Kuya Amin” ay nagkaroon ng pagpaplano at pagtulong sa mga nasunugan sa Barangay Apolonio noong Enero 04, 2015. Sila Ay nagtulong tulong kaakibat ang CRS-AFP, 7^th CRG sa pagbibigay ng mga relief goods sa mga biktima ng sunog.

Ayon kay Kuya Amin, ang ginawa nilang hakbang ay pagpapakita na ang mga kabataang Muslim ay nakikiramay at nakikisampatya sa mga biktima ng sunog, Kristyano man o Muslim.

Ang kaganapang ito ay isang patunay na lumalakas at dumadami ang mga kabataang nagkakaroon ng muwang at pakialam sa kanilang kapwa at bansa. Ang pagtulong ay walang limitasyon kung kayat ang mga kabataang ito sa kanilang sariling pangunguna ay nagsagawa ng pagtulong at pagdamay sa mga biktima ng sunog. Isa ito sa mga kabayanihang dapat kilalanin at ipagmalaki ng ating bansa.